Kjósendur Flokksins vita, að hann er bófaflokkur. Kæra sig kollótta um það. Þeir vilja hafa flokkinn svona, telja sig geta fengið mola af veizluborðinu. Þetta eru 20% þjóðarinnar og fylgi Flokksins lækkar bara niður undir það. Er auðvitað mikil hátíð í samanburði við þær svörtu miðaldir, þegar fylgið var 35-40%. Um Framsókn gegnir öðru máli. Þar er kjarnafylgið hrunið, var komið niður undir 10% árið 2009. Sigmundi Davíð tókst árið 2013 að ljúga sig inn á heimska skuldara og sigla inn með 15% viðbótarfylgi. Nú er lygin farin að sjást, fylgið hrunið í 15% og fer vonandi niður í 10%, þar sem það á heima.
Afturfótafæðing ráðningar forseta hug- og félagsvísindadeildar súpergaggós á Akureyri stingur í augu. Stefán B. Sigurðsson rektor virðist hafa tíu þumla og fjögur handarbök. Búinn að hafa mikið fyrir að hindra forsetastól Ólínu Þorvarðardóttur. Sumpart vegna fjölskylduhagsmuna. Og sumpart vegna þess, að súpergaggó er aðili að ágreiningi kvótagreifa við lattelepjandi lopatrefla í hverfi 101. Súpergaggó á Akureyri hefur ekkert fræðilegt gildi og er bara til að sýnast fyrir Norðlendinga. Tímabært að leggja hann niður og gera að útstöð fyrir alvöru-háskóla. Ef slíkur fyrirfinnst í þessu ríki spillingar.
Svana Helen Björnsdóttir hefur bent á, að fjármálaráðherra er ekki bara að halda lífi í krónunni með gjaldeyrishöftunum. Hann er að reyna að verja fimm gjaldmiðla. Þarna er ferðamannakrónan og verðtryggða krónan, aflandskrónan og tvenns konar undanþágukrónur Seðlabankans. Orðið verra en fyrir hálfri öld á tíma bátagjaldeyris og námsmannagjaldeyris. Ríki með minnsta gjaldeyri heims heldur í rauninni úti fimm gjaldmiðlum. Menn eru búnir að belgja sig of átakanlega út í dálæti á hinni einu sönnu og þjóðlegu krónu. Þeir eru að fórna fjárhagslegum hagsmunum þjóðarinnar. Þannig er grínið á Íslandi í dag.
Nokkrum sinnum birtast þættir í spjalli innvígðra um samningana við Evrópu. Það sérkennilega við þessa búta er, að þeir snúast um efni, sem er enn lokað fyrir almenningi. Fólk hefur ekki fengið tækifæri til að sjá, á hvaða stigi Evrópusamningarnir voru. Getur því ekki haft skoðun á málsefninu. Að vísu hefur birtingu verið lofað, en þessi ríkisstjórn lofar svo mörgu. Dæmigert fyrir lokað og leyndó stjórnkerfi. Ríkisstjórnin og eigendur hennar í útgerð á kvóta spjalla opinberlega um, hvernig beri að túlka orð stækkunarstjóra Evrópusambandsins. Betra þætti mér að hafa heimildirnar sjálfar til að lesa.
Í bókinni
Flat Earth News rekur Nick Davies, hvernig Exxon og aðrir helztu umhverfissóðar dreifa loftslagslygum. Halda fram, að loftslagið sé ekki að breytast og ekki af mannavöldum. Í þessu skyni halda þessir aðilar úti ýmsum gervisamtökum og stofnunum, vísindamönnum og einkum almannatenglum. Davies rekur í smáatriðum, hvernig það er gert. Ein þessara stofnana er World Ocean Council, sem fjármagnar Arctic Circle, er hélt ráðstefnu í Hörpu um daginn. Þar er Ólafur Ragnar Grímsson forseti settur á oddinn. Kunnur af vináttu í garð stórfyrirtækja og stórfursta, sem bregða fæti fyrir þekkingu fólksins.
Sveitavargurinn í Tyrklandi flýr sult og seyru landsbyggðar til Miklagarðs. Þar efnast margir, linast í trúnni og fara að dýrka Mammon eins og aðrir vestrænir. Mústafa Kemal Tyrkjafaðir vildi að Tyrkir tækju upp evrópska siði og menningu. Mikligarður varð aftur evrópsk borg 1930-2000. Sumir aðkomumenn vildu hins vegar ekki evrópuvæðast, héldu fast í fortíðina. Urðu kaþólskari en páfinn! Leita forskrifta til arabískra wahabíta úr eyðimörkinni. Til urðu hverfi ofsatrúarfólks, sem hafnar vestrænum gildum. Þróun menningar og siða í Miklagarði liggur því í tvær áttir í senn, fram á við og aftur í tímann.
Hanna Birna Kristjánsdóttir flutti þreyttar lummur, þegar hún var spurð um Gálgahraunsveginn á flótta hennar austur á land. Sagði nýja veginn veita meira öryggi. Aldrei hefur það verið rökstutt, en hins vegar bent á aukna hættu af völdum nýja vegarins. Hanna Birna nennti semsagt ekki að kynna sér málið til að geta gefið veigameiri svör. Ráðherratími hennar hefur ekki sýnt svör við neinu. Hún vísar öllu frá sér, svo sem Snowden og uppboðsfresti vegna hæpinna gjaldþrota. Minnir á ferilinn í borgarstjórn. Seldi HS Orku til Magma og gerði Ólaf lækni að borgarstjóra. Gerði hún þar nokkuð fleira?
Skyndilega er komið í ljós, hvers vegna nauðsynlegt er að leggja aðalbraut um Gálgahraun. Með því kemst jörðin Selskarð í gott samband við vegakerfi höfuðborgarsvæðisins. Jörðina eiga meðal annarra þeir Engeyjarbræður, Einar og Benedikt Sveinsson, faðir fjármálaráðherrans. Með veginum verður hægt að selja lóðir dýrum dómum úr jörðinni. Samkvæmt skipulagi, sem gert var, þegar Bjarni Ben. var í skipulagsnefnd Garðabæjar. Þar með aukast eignir Engeyjarættar um hundruð milljóna og tekjurnar að sama skapi. Bráðræði þessarar vegagerðar er bara hefðbundin lóðaspilling um að auka skyndilega verðmæti landareignar.
Ýmsum rökleysum er haldið fram til að verja eyðileggingu Gálgahrauns með óþörfum vegi. Ein er, að auka þurfi öryggi Álftanesleiðar. Engar tölur hafa verið birtar um það. Önnur er, að heiti hraunsins sé annað, eins og það komi eyðileggingunni eitthvað við. Þriðja er, að vegurinn sé altjend löglegur. Um það má deila. Lagatæknar segja ýmist. Meðal annars að ljúka þurfi dómsmálinu áður en óafturkræfar skemmdir eru unnar. Ennfremur, að dómstólar hafi ekki farið að alþjóðalögum, er þeir höfnuðu aðkomu almannasamtaka að umhverfinu. Íslenzkir dómarar sýna ítrekað, að þeim eru fáfróðir um rétt almennings.
Kristján Þór Júlíusson fór sem oftar með rangt mál á Stöð 2 og var að venju ekki vefengdur af Heimi Má Péturssyni. Ráðgert hjúkrunarheimili í Reykjavík var ekki innistæðulaust. Varð fyrst innistæðulaust, þegar nýja ríkisstjórnin fleygði tugmilljörðum í gjafir til kvótagreifa, auðgreifa og ferðaþjónustu. Þess vegna er ekki lengur til fé í ýmis brýn mál eins og hjúkrunarheimili og Landspítalann. Ráðherrann reynir að kenna fyrri ríkisstjórn um það, sem er eingöngu núverandi ríkisstjórn að kenna. Hóf feril sinn á að gefa eigendum sínum gjafir. Getur því ekki komið saman nothæfum fjárlögum fyrir fólkið.
Uppljóstranir hafa leitt í ljós, að hagsmunaaðilar og ríkisstofnanir stunda víðtækar falsanir, er komast framhjá hliðvörzlu fjölmiðla. Þannig reka Exxon og aðrir umhverfissóðar öflugar lygar um, að loftslagsbreytingar séu engar og ekki af mannavöldum. Leyniþjónustur og ráðuneyti flytja stórtækar lygar um aðdraganda styrjalda og framvindu þerra. Fremst í flokki eru CIA, brezku leyniþjónusturnar og NATÓ. Dreift er lygum um Saddam Hussein. Bashar Assad og yfirleitt alla, sem eru fyrir vesturveldunum. Fáfróðir fjölmiðlar gleypa við flóðinu. Lygaflaumur í fjölmiðlum varð sérkenni tveggja síðustu áratuga.
Cardiff-skýrslan um stöðu fjölmiðlunar sýnir, að staðfestingar hafa að mestu fallið niður. Beztu fjölmiðlar Bretlands lifa á óstaðfestum fréttum Press Association og Reuters, sem síðan eru óstaðfestar af miðlunum. Mikið af restinni er PR almannatengla og blaðurfulltrúa. 18% fréttaefnis beztu miðla er eigin vinna. Fréttastofur eru orðnar að verksmiðjum. Journalism er orðið að Churnalism. Starfsfólki hefur fækkað um helming og afkastakröfur hafa þrefaldazt. Engin tíð er lengur til staðfestinga. Í Bretlandi eru fleiri PR-menn en blaðamenn. Fréttamagnið hefur aukizt, en traustið bilað. Staðan er heldur skárri hér.
Erfitt er að átta sig á berserkslátum, sem gripið hafa opinbera kontórista með vegamálastjóra í broddi fylkingar. Vegurinn yfir Gálgahraun er út í hött og kostar milljarð, meðan Landspítalinn sveltur. Enginn þarf á þessum vegi að halda, nema bæjarstjórn Garðabæjar, sem ekki þarf að borga krónu fyrir ruglið. Sökin er fyrst og fremst á herðum Hreins Haraldssonar. Hann sættir sig ekki við að hafa fengið núll í heilbrigðri skynsemi. Hann skal samt fá að nauðga sérstæðri náttúru með því að troða þessum óþarfa vegi á hraunið. Sigar fávísri löggunni á valinkunna borgara til að segja: Minn er mátturinn.
Hinir fylgislausu landsfeður eru úrvinda eftir afrek vorsins. Búnir að létta byrðum af kvótagreifum, öðrum auðgreifum og ferðaþjónustu. Of þreyttir til að afgreiða þá, sem eru aftar í forgangsröðinni. Íbúðaskuldarar þurfa því að bíða til dauðans óvissa tíma eftir tékka í pósti. Sjúklingar verða að borga banaleguna á Landspítalanum til að bæta ríkinu tjónið af stóraukinni velferð auðgreifa. Meðan sætabrauðsformenn liggja í öngviti vaða minni spámenn um og heimta auknar misþyrmingar á aumingjum. Þetta er langversta byrjun stjórnar á þeim sextíu árum, sem ég hef horft á pólitíkina. Og allt fyrir auðgreifa.
Fylgið hrynur hraðar af eymdarstjórninni en það gerði á fyrstu fimm mánuðum vinstri stjórnar Jóhönnu. Umbar auðgreifanna eru komnir niður í 37% fylgi. Gætu þess vegna sagt af sér, ef þeir fylgdu eigin kröfu frá því fyrir fjórum árum. Verst er hrakför Framsóknar, sem hefur rýrnað um nærri helming. Flúnir eru flestir, sem létu ljúga að sér, að tékkar kæmu í pósti eftir kosningar. Og smám saman er fólk að fatta, að Sjálfstæðisflokkurinn er aðeins fyrir þá ríkustu og gefur skít í aðra. Flokkar silfurskeiðunga hafa misst respekt til að gera breytingar á þjóðfélaginu. Hlutverkinu lokið og dauðastríðið hafið.